Заява Рады ПЦ "Вясна" наконт затрымання Марфы Рабковай.

"Спробы абвінаваціць Марфу Рабкову ў падрыхтоўцы масавых беспарадкаў з'яўляюцца неабгрунтаванымі, надуманымі і палітычна матываванымі."

Заява Amnesty International аб прызнанні Марфы Рабковай вязнем сумлення.

"Amnesty International лічыць, што Марфа Рабкова стала ахвярай пераследу выключна за сваю працу па абароне правоў чалавека і з'яўляецца вязнем сумлення."

Заява Абсерваторыі па абароне праваабаронцаў, партнёрства Сусветнай арганізацыі супраць катаванняў (ОМСТ) і FIDH, па факце пераследу праваабаронцы Марфы Рабковай.

Затрыманне Андрэя Чапюка.

Прызнанне Андрэя Чапюка палітвязнем.

Праваабаронцы патрабуюць спыніць крымінальны пераслед свайго валанцёра.

"Мы будзем працягваць сваю праваабарончую дзейнасць на карысць усяго беларускага народа!"

ПЦ "Вясна" выпускае фільм "Свабоду Марфе Рабковай".

Марфа Рабкова становіцца тварам кампаніі #BelarusHeroes.

"Жадаем, каб зняволеныя ведалі, што пра іх думаюць, што яны вядомыя і сталі нашымі героямі, а рэжыму будзе не так проста іх крыўдзіць і бясконца трымаць за кратамі."

У Марфы з'яўляецца "хросная" ў межах кампаніі #WeStandBYyou.

Затрыманне Леаніда Судаленкі.

"Сістэмны ціск на праваабаронцаў у Беларусі працягваецца. Мы сутыкаемся з крыміналізацыяй нашай мірнай дзейнасці, падвяргаемся сістэмнаму прыгнёту і запалохванню, адвольным затрыманням, прыніжаючаму годнасць абыходжанню, абмежаванням на перамяшчэнне, дыскрымінацыяй паводле сваіх перакананняў."

Затрыманне Таццяны Ласіцы.

Front Line Defenders заклікае спыніць крымінальны пераслед Л. Судаленкі.

"Арганізацыя Front Line Defenders заклікае ўлады Беларусі неадклаадна спыніць крымінальны пераслед Леаніда Судаленкі, паколькі ён выкліканы выключна ягонай законнай і мірнай праваабарончай дзейнасцю."

Леаніду Судаленку прад'яўляюць абвінавачванне.

Сумесная заява беларускіх праваабарончых арганізацый аб вызваленні Таццяны Ласіцы.

"Патрабуем неадкладнага і безумоўнага вызвалення з-пад варты валанцёркі ПЦ "Вясна" Таццяны Ласіцы і спынення крымінальнага пераследу ў дачыненні да яе."

Справу Леаніда Судаленкі перадаюць у Цэнтральны апарат Следчага камітэта.

"У дзень па 15-20 лістоў атрымліваю. Вечарамі адпісваюся, дык час хутчэй ляціць. Ужо адвык ад сацсетак, давядзецца наноў вучыцца."

Марфу Рабкову ставяць на прафулік як "схільную да экстрэмізму".

Таццяна дасылае сваім блізкім ліст і малюнак.

"Нягледзячы ні на што, думай толькі пра добрае, усё гэта часовыя цяжкасці. Усё наладзіцца, усё будзе добра!"

Андрэй Чапюк сустракае свой дзень народзінаў у турме.

"І вось у яго такі дзень быў - мы паснедалі, потым у яго чытанне, пасля абеду заняткі фізічныя, на шпацыры заняткі фізічныя, зноў чытанне і нейкія бытавыя справы.

І вось Андрэй і вёў такое жыццё - спорт, чытанне, спорт. Яго ніхто ніколі не чуў і не бачыў - ён быў увесь час заняты. Увесь час у сабе."

Алег Граблеўскі

Затрыманне Валянціна Стэфановіча.

Затрыманне Уладзіміра Лабковіча.

Ціск на Андрэя ў СІЗА-1.

Еўрадэпутаты выступілі ў абарону Бяляцкага, Стэфановіча і Лабковіча.

"Іх затрыманне - ганьба. Беларускія ўлады павінны зразумець, што немагчыма пасадзіць у турмы ўсё грамадства, якое ў мінулым годзе праявіла неверагодную мужнасць і рашучасць у барацьбе за свабоду."

Суд адмовіў Бяляцкаму ў задавальненні скаргі на меру стрымання, праваабаронца застаецца ў СІЗА.

Атрыманы першы ліст ад Алеся Бяляцкага.

Першы ліст ад Валянціна Стэфановіча.

"Я ведаю, што адбываецца ў апошнія дні ў нашай краіне. Наш арышт з'яўляецца зразумелай з'явай у гэтай сітуацыі. Я настройваюся на вельмі доўгае расстанне са свабодным светам, але ўсё роўна спадзяюся на лепшае. Усё пройдзе, пройдзе і гэта, і мы зноў будзем разам."

Уладзімір месяц за кратамі.

"Я думаю, што мы будзем побач, нават калі мы будзем сядзець."

Леанід Судаленка атрымлівае спатканне з жонкай перад судом.

"І як мяне можа судзіць чалавек, які не бачыць для спаткання "прававых падступаў", бо закон не забараняе спатканні з блізкімі сваякамі?"

Леанід Судаленка і Таццяна Ласіца адмовіліся пісаць прашэнне аб памілаванні па прапанове Юрыя Васкрасенскага.

"І мне, і Таццяне прыходзілі лісты з прапановай аб памілаванні, але гэта не варыянт, бо трэба прызнаць віну. Канешне, мы не пісалі. Няхай яны самі скажуць, што праваабарона = злачынства..."

(з ліста Л. Судаленкі)

Пачатак суда над Судаленкам і Таццянай Ласіцай.

"Як ты ўжо ведаеш, суд зрабілі закрытым ад граху падалей. Цёмныя справы робяцца за замкнёнымі дзвярыма, і з гэтым не паспрачаешся. Я абскардзіў тым не менш, патрабуючы публічнасці суду."

У Алеся з'яўляецца "хросная" ў межах кампаніі #WeStandBYyou.

"Быць актыўным удзельнікам грамадзянскай супольнасці не з'яўляецца злачынствам. Новая дэмакратычная Беларусь, нараджэнне якой мы бачым, мае патрэбу ў вас, Алесь Бяляцкі."

Ва Уладзіміра з'яўляецца "хросны" ў межах кампаніі #WeStandBYyou.

У Валянціна з'яўляецца "хросны" ў межах кампаніі #WeStandBYyou.

"Дзеля ўсіх тых, каму зараз патрэбная наша падтрымка і салідарнасць, я бяру на сябе палітычныя абавязкі "хроснага" Валянціна Стэфановіча."

Марфа ў турме ўжо год.

"Мне таксама не верыцца, што мінуў год. Часам ад гэтага становіцца сумна, як падумаеш аб тым, колькі часу ты ў зняволенні. Час хутка ідзе, і чым далей - тым хутчэй. Ведаць бы, колькі яшчэ цярпець, нават калі дзень вызвалення не хутка, хацелася б яго ведаць. Так прасцей чакаць, невядомасць вымотвае."

Леанід Судаленка сустракае свой дзень народзінаў у зняволенні.

"Я ўжо страціў і страчу на бліжэйшы час свабоду, але застаюся з галоўным - сваім сумленнем і праўдай. А з імі любыя выпрабаванні не страшныя. Усё праходзіць - і гэта пройдзе. Я дваццаць гадоў займаўся абаронай правоў іншых людзей і ў страшным сне не мог уявіць, што гэтую дапамогу ператвораць у крымінальную."

"Вялікі дзякуй за віншаванні з ДН! Таксама за падтрымку і ўвагу да нас, тых, хто аказаўся на гэтым беразе ракі. Гэта тое, чаго не хапае нам усім, гэта тое, што дае нам сілы вытрымаць у паўзмроку падарункі лёсу... Я веру, што ўжо заўтра ўсё будзе інакш."

Алесь Бяляцкі сустракае дзень народзінаў у турме.

Ліст ад Уладзіміра Лабковіча.

Бяляцкаму прад'яўлены абвінавачанні ва ўхіленні ад сплаты падаткаў.

Марфе Рабковай дазволілі першае за доўгі час зняволення спатканне з мужам.

Валянцін сустракае свой дзень народзінаў у зняволенні.

"Лісты для мяне зараз ледзь не адзіны канал камунікацыі з навакольным светам. Я зараз жыву лістамі і снамі, У якіх я сустракаюся са сваімі сябрамі, калегамі, сям'ёй, з жывымі і мёртвымі. Калі-небудзь я напішу пра гэтыя сны, сны ў падвалах Пішчалаўскага замка..."

Алесь Бяляцкі, Валянцін Стэфановіч і Уладзімір Лабковіч 100 дзён у зняволенні.

Уладзіміру Лабковічу спаўняецца 43 гады.

"Дзень народзінаў я сустрэў цяпло. Паелі самаробны торт з гарбатай. Пісаў казку дзеткам. Былі і паштоўкі з віншаваннямі. Але, на жаль, вельмі шмат віншаванняў згубіліся. Тым прыемней кожны ліст, які прарываецца."

Ліст ад Алеся з СІЗА.

"Галоўнае не ўпадаць у дэпрэсію і не сумаваць. Я веру, што хутка ўсё будзе добра. А тое, што нас не забівае, робіць мацнейшым."

Пачалася акцыя вершаў "Не толькі Бродскі" ў падтрымку заняволенага вясноўца Уладзя Лабковіча.

"Беларусы і беларускі працягваюць верыць у лепшае для нашай краіны і робяць усё магчымае для гэтага, нягледзячы на тое, што сітуацыя ў Беларусі, мякка кажучы, сапраўды часта нагадвае некаторыя вершы Бродскага."

Таццяна Ласіца сустракае свой дзень народзінаў у зняволенні.

"На Дзень народзінаў мне дашлі лісты, паштоўкі, тэлеграмы. Усім вялікі ДЗЯКУЙ! Мне было вельмі прыемна. Усё мне жадалі здароўя, хутчэйшага вяртання дадому. Я зрабіла торт з каржоў, былі цукеркі, кола, спрайт, печыва і іншае, як сапраўдны салодкі стол. Усё прайшло добра."

Human Rights House з Осла павіншавалі Таццяну з днём народзінаў.

Міжнародны ПЭН заклікае вызваліць Алеся Бяляцкага.

Марфе прад'яўляюць канчатковыя абвінавачанні па 11 артыкулах Крымінальнага кодэкса.

Спатканне Леаніда Судаленкі з жонкай.

"Муж верыць, што рана ці позна ўсё павінна змяніцца, скончыцца, і настане пераломны момант."

Марфа Рабкова становіцца пераможцай Нацыянальнай прэміі за дасягненне ў галіне правоў чалавека ў намінацыі "Праваабаронца года".

"Да мяне прыходзіла адвакатка амаль перад самым НГ, і я даведалася, што стала праваабаронцай года. Гэта такі гонар, я расплакалася :)

Я буду рабіць усё, што ад мяне залежыць, адукоўваць, несці веды і абараняць правы чалавека незалежна ад межаў, часу і месца."

У снежні Валянцін 3 тыдні ляжыць з пнеўманіяй у турэмным шпіталі.

"Я павінен трымацца, берагчы сілы і здароўе, таму што не маю права памерці тут, я абавязаны вярнуцца жывым да сваіх дзетак і сям'і."

Ліст ад Таццяны Ласіцы.

"Не хвалюйцеся, я трымаюся, не сумую. Цяпер знаходжуся на апеляцыі, новы год буду адзначаць тут."

Валянцін віншуе сваіх калег з Міжнародным днём абароны правоў чалавека.

"Азіраючыся назад, дух захоплівае ад зробленага намі, ад нашай шматгадовай упартай працы. Працы, якая часам выглядвае безнадзейнай, але гэта толькі на першы погляд можа так падацца. Таму ў наш прафесійны дзень, сябры, трымайце галовы высока паднятымі і ганарыцеся тым, што вы робіце!"

Прыходзіць ліст ад Уладзіміра.

"Сёння пяць месяцаў роўна, як я ў вязніцы. Сумна, канешне, асабліва ад разумення, што наперадзе бясконцасць тут. Я б таксама хацеў пабачыць надзею, але тут пакуль халодна, вільготна і няма сонца. А вам трэба ісці наперад. І толькі так!"

Ліст ад Алеся з СІЗА.

"З вялізным жалем даведаўся, што пайшоў з жыцця мой даўні сябра і блізкі мне чалавек Сяргей Гоўша. Гэта вялікая і невымерная страта для нас, для мяне асабіста. Вялікія спачуванні ягонай жонцы і дзецям."

Ліст ад Леаніда Судаленкі.

"Час ідзе. Ужо тут дванаццаты месяц. Нядаўна вельмі моцна прастудзіўся. Кашаль на начах, пару дзён тэмпературыў. Але выкараскаўся, жонка лекаў перадала. Галоўнае, каб здароўе не падвяло, усё ж такі ўжо не маладыя."

Ліст ад Валянціна Стэфановіча.

"Я атрымаў шмат віншавальных паштовак і, у тым ліку, ад зусім незнаёмых людзей. Гэта вельмі важна, гэта тое, што ў нас ніхто не адбярэ і не забароніць, - наша салідарнасць."

Марфа Рабкова сустракае 27-годдзе ў СІЗА.

Справа ў дачыненні да Андрэя Чапюка і 9 палітвязняў перададзеная ў пракуратуру для накіравання ў суд.

Ліст ад Судаленкі.

"Да канца студзеня давядзецца ехаць ужо ў лагер на "перавыхаванне". Я маральна гатовы, галоўнае - не падвяло б здароўе. Час ідзе. Тое, што адбываецца на тым беразе ракі, не надае ўпэўненасці, што палітычныя выйдуць заўтра на волю. Але зараз такі час, ніхто не ведае, што будзе заўтра..."

Amnesty International патрабуе вызвалення Леаніда Судаленкі і Таццяны Ласіцы.

"Леанід Судаленка і Таццяна Ласіца не здзейснілі ніякага міжнародна прызнанага крымінальнага дзеяння, прысуд ім - пакаранне за іх законную праваабарончую дзейнасць. Судаленка і Ласіца павінны быць неадкладна і безумоўна вызваленыя."

Суд не задаволіў скаргу Бяляцкага на падаўжэнне тэрміна зняволення.

Год з моманту затрымання Леаніда Судаленкі.

Леаніда этапуюць у калонію.

Таццяну пераводзяць з СІЗА ў папраўчую калонію №4.

"Там свае правілы і патрабаванні, што дазволяць пакінуць, што проста выкінуць давядзецца. Ці змагу там пісаць лісты, ці будзе час... не ведаю. Ёсць магчымасць, гавораць, тэлефанаваць сваякам, нават праз скайп ці вайбер на выбар."

У Таццяны з'яўляецца новы "хросны" ў межах кампаніі #WeStandBYyou.

Ліст ад Уладзіміра Лабковіча.

"Вельмі ўзрадаваўся, атрымаўшы ад вас цёплую паштоўку, а яшчэ налепкі і выдатныя лісты. Буду на іх пісаць дзеткам працяг казкі. Даўно не мог пачаць пісаць працяг для іх, бо казка павінна быць вясёлай, але настрой у мяне вельмі сумны."

ПЭН-клуб Паўднёвай Афрыкі выпусціў падкаст пра Алеся Бяляцкага пад назвай "Пустое крэсла".

Ліст ад Леаніда Судаленкі.

Ліст ад Валянціна Стэфановіча з асуджэннем вайны ва Украіне.

"Адно можна сказаць - гэта нічым не прыкрытая агрэсія Расіі, і свет ужо не будзе такім, як быў ва гэтага. Мы вяртаемся, прычым імгненна, у часы жорсткага супрацьстаяння з Захадам, як у часы СССР. З усімі наступствамі - жалезнай заслонай і гістэрычнай прапагандай, скіраванай на прамыўку мазгоў людзей."

Фотапартрэт Алеся Бяляцкага размешчаны на выставе "Вольная Беларусь" у Гданьску.

Сур'ёзнае пагаршэнне здароўя Марфы ў СІЗА.

Пачынаецца суд над Марфай Рабковай, Андрэем Чапюком і яшчэ 9 палітвязнямі. Суд зрабілі закрытым.

"Я супакойвала сябе фразай: усё, што нас не забівае, робіць мацнейшым. І яшчэ я ціхенька спявала "Купалінку", каб не было страшна.
У судзе, калі апынулася і ўбачыла шмат людзей, мне так захацелася дадому. Проста ўзяць і выйсці за дзверы. І ў мяне было пачуццё, быццам і не было гэтых 19 турэмных месяцаў, што ўсё гэта мне прыснілася. Але гэта таксама былі горкія думкі. Трэба перажыць і трываць гэты цяжкі перыяд."

Марфа Рабкова

"У матэрыялах справы 160 тамоў. Пры гэтым майму абаронцу не было дадзена магчымасці фатаграфаваць. Гэтыя абставіны ўказваюць на тое, што суддзя яшчэ да суда парушае маё права на абарону."

Андрэй Чапюк

Валянцін віншуе сваіх калегаў з гадавінай заснавання "Вясны".

"Дарагія сябры! Віншую нас усіх з нашай 26-ай гадавінай! Для нас гэта вялікі ўзрост, шмат чаго мы зведалі за гэты час, шмат выпрабаванняў прайшлі і яшчэ пройдзем! Перакананы, што мы абавязкова сустрэнемся, абдымемся і будзем крочыць гэтым шляхам разам далей!"

Ваш Валянцін

Знаходзячыся ў СІЗА, галоўная рэдактарка "Новага часу" Аксана Колб сустрэла Марфу Рабкову.

"Марфа выглядае добра. І знешне, і псіхалагічна, і па настроі. Я нават і не думала, што ўбачу Марфу ў іншым стане. Відаць па ўсім, што Марфа ў добрым настроі. Яна ні пра што не шкадуе, нягледзячы на тое, што на яе навешваюць і што ёй пагражае."

Андрэй Чапюк сустракае свой другі дзень народзінаў у турме.

Amnesty International Polska сабрала больш за 5000 подпісаў пад петыцыяй за вызваленне Марфы Рабковай. Іх аднеслі ў беларускую амбасаду.

Год са дня затрымання Валянціна Стэфановіча.

Год са дня затрымання Уладзіміра Лабковіча.

Партрэт валанцёркі "Вясны" Таццяны Ласіцы быў створаны мастачкай Ганнай Татур у межах ініцыятывы "Палітвязынка".

Леанід Судаленка не паверыў, што ва Украіне ідзе вайна.

"З лістамі з волі ўсё кепска, аддаюць праз раз. Пра многія рэчы ён дазнаецца, калі яму паведамляем. Напрыклад, пра вайну ва Украіне паведамілі яму мы. Калі распавялі пра Марыупаль, ён спярша не паверыў, падумаў, што нешта мы не тое прачыталі. У цэлым ён цяпер у курсе і пра РЭП, і пра "Вясну", - распавялі родныя Леаніда."

У другую гадавіну пераломных выбараў у Беларусі праваабаронцы "Вясны" на адной з віленскіх вуліц вывесілі плакаты з вядомымі выразамі палітзняволеных калег - Алеся Бяляцкага, Валянціна Стэфановіча і Уладзя Лабковіча.

Валянцін Стэфановіч у лісце падзяліўся сваімі думкамі наконт зняволення.

"Турма зацягвае, чалавек да ўсяго прызвычайваецца, яна ўжо не палохае цябе. Вось і я ўжо не баюся, бо я ўжо ў турме. Менавіта таму я нікуды не паеду адсюль. Я застануся тут, бо калі з'еду ўжо ніколі сюды не вярнуся. А ім мяне больш няма чым палохаць, бо турмы я ўжо не баюся. Такое вось маё рашэнне."

Уладзімір Лабковіч даслаў кранальны ліст у адказ на атрыманую бандэрольку ад салідарных людзей.

"Я вельмі захапляюся ўсім, што звязана з Антычнасцю, таму так прыемна было атрымаць паштоўку з Афінамі. Вядома ж і Мінск. Так бы хацеў прагуляцца з жонкай і дзеткамі па Мінску, але баюся, што не давядзецца. Неяк зусім згубіў надзею, што адсюль увогуле ёсць выйсце, што ўрэшце рэшт прыйдзе вызваленне. Вельмі ўж цяжка знаходзіцца тут так бясконца доўга."

Вясноўцам агучылі прысуд: Марфе Рабковай - 15 гадоў калоніі, Андрэю Чапюку - 6 гадоў калоніі.

Апошняе слова Марфы Рабковай у судзе.

"Я бачыла столькі добрых і светлых твараў, я бачыла столькі сапраўдных людзей, што ўпэўненая - мы абавязкова ўсё пераадолеем, па-іншаму проста быць не можа. Штораз, калі мы дапамагаем адно аднаму, клапоцімся, працягваем руку ўзаемадапамогі, выказваем салідарнасць, калі наша сэрца не глухое да чужога болю - мы набліжаем надыход нашай будучыні, нашай Беларусі. Не адчайвайцеся і верце ў сябе, у свае сілы! Праўда на нашым баку!"

Апошняе слова Андрэя Чапюка ў судзе.

"Я ведаю, што кожны ў хуткім часе адкажа за свае дзеянні, за свае рашэнні перад грамадствам. Не трэба гэта расцэньваць як пагрозу. Рэальнасць паказвае, што праўда, аб'ектыўнасць і справядлівасць мацнейшыя за бандыцкія метады МУС і КДБ. Людзі не палохаюцца ўстаць на шлях барацьбы за правы!"

Вадзім Жаромскі, муж Марфы Рабковай, сустрэўся з ёй у СІЗА пасля прысуду.

"Перадаў ёй прывітанні - яна вельмі дзякуе ўсім. Распавёў пра міжнародную падтрымку і рэакцыі на прысуд міжнароднай супольнасці - была радасная і задаволеная, што яе не забываюць. Прысуд успрыняла адэкватна, кажа: "Бязглуздзіца". На амністыю нават блізка не разлічвае... Але спадзяецца на лепшае!"

Валянцін Стэфановіч даслаў вестачку на волю.

"Што б з намі ні здарылася, Вясна была і будзе! Нам ужо 27-ы год пайшоў, і я ўпэўнены, што мы яшчэ адзначым і наша 30-годдзе ўсе разам."

Леаніду Судаленку споўнілася 56 гадоў.

Праваабаронца Беларускага Хельсінкскага камітэта Павел Левінаў - пра сяброўства з праваабаронцам "Вясны":

"Леанід Судаленка сядзіць, а справа яго жыве. І крымінальная справа ў дачыненні да Леаніда - гэта помста ўладаў Леаніду за яго праваабарончую дзейнасць. За тое, што ён праўдзіва паказваў Беларусь на міжнароднай арэне. Я веру ў яго, што ён годна пройдзе ўгатаваны яму лёсам шлях. І жадаю - не толькі яму, а і сабе - як мага хутчэй абняць свайго брата па праваабароне."

Палітзняволеная праваабаронца і валанцёрка ПЦ "Вясна" Таццяна Ласіца была нечакана вызвалена з Гомельскай калоніі. За кратамі Ласіца прабыла агулам 1 год і 8 месяцаў. Прычына яе вызвалення - памілаванне.

Алесю Бяляцкаму - 60 гадоў!

"Кантрабанда" і "фінансаванне пратэстаў" - палітзняволеным праваабаронцам "Вясны" ўзмацнілі абвінавачванні.

"Вясне" ўручылі прэмію The Albie Awards 2022, заснаваную Фондам "Клуні за справядлівасць".

"Больш за два дзесяцігоддзі мы з мужам і нашы адважныя калегі змагаемся за дэмакратыю ў Беларусі. Як лідар "Вясны" менавіта ён павінен быў стаяць тут сёння і атрымліваць гэтую выдатную ўзнагароду. Ён не можа гэтага зрабіць, таму што знаходзіцца за кратамі."

Нобелеўская лаўрэатка па літаратуры Святлана Алексіевіч: "Бяляцкі даўно заслужыў Нобелеўскую прэмію".

"Лічу Бяляцкага міфалагічнай фігурай беларускай барацьбы. Заслужыў - гэтага мала сказаць. Гэта ўжо даўно яго прэмія. Тое, што зрабіла і робіць у гэтых умовах створаная ім "Вясна", - гэта ў ягоным духу, у ягонай філасофіі. Я вельмі рада."

"Вясна прыйдзе!". Мастачка Вольга Якубоўская прысвяціла працу Алесю Бяляцкаму.

Валянцін Стэфановіч адзначыў у турме свой юбілей - 50 гадоў.

"Я закладнік, я палонны, і ўсё будзе вырашацца зусім па-іншаму. Таму мне не важна, што яны там мне ставяць у віну і малююць у гэтай справе. Вінавацяць мяне ў тым, што я дапамагаў людзям.

Ну хай пасадзяць мяне за гэта, за такое сядзець ганарова, мне - праваабаронцу.

Я ганаруся гэтым! Гэта для іх я кантрабандыст, а для людзей я той, хто дапамагаў ім усе гэтыя гады. Так, гэта я! Я той, хто быў на сваім месцы, быў да канца."

Уладзю Лабковічу споўнілася 44 гады.

"Толькі што атрымаў цудоўную пасылачку ад вас з такімі чароўнымі паштоўкамі, і адразу вырашыў напісаць ліст. Вельмі кепска прыходзяць лісты. Балюча гэта, вядома. Бо лісты - гэта самае радаснае тут. Я пражываю дзень за днём у чаканні лістоў. Зрок псуецца, але я кожны дзень пішу лісты Ніне і дзеткам. Толькі б яны не губляліся. Я вельмі спадзяюся, а раптам мае лісты да вас даходзяць."

Валянцін Стэфановіч пераабраны віцэ-прэзідэнтам FIDH.

"Праваабарончая салідарнасць - магутная сіла, і я веру, што хутка змагу далучыцца да вас, каб разам крочыць па гэтым нялёгкім шляху, да сусветнай гармоніі, любові і міру."

Юрыст Павел Сапелка падарыў прэзідэнту Францыі цішотку з выявай зняволенага кіраўніка "Вясны" Алеся Бяляцкага.

"Дзякуй Міжнароднай федэрацыі правоў чалавека, якая вось ужо 100 год удзельнічае ва ўсіх бітвах. Сёння яна змагаецца, дзякуючы дзеянням гэтых жанчын і мужчын, якія дзейнічаюць супраць беспакаранасці з рызыкай для жыцця. Яны ведаюць, што могуць разлічваць на нашу падтрымку, - напісаў пасля сустрэчы Эманюэль Макрон."

Леанід Судаленка дазнаўся пра статус "экстрэміста".

"Я яму напісала пра гэтую навіну і пра яго "шчаслівы" нумар 607 у так званым спісе экстрэмістаў. Ён успрыняў гэта як чаканае, але папрасіў закон і падставы ўключэння ў спіс."

Валянцін Стэфановіч: "Уваляць нам шмат і дэманстратыўна жорстка".

"Часам праз вакно да мяне даносяцца аддаленыя гукі горада. Я нібыта памёр, я выкраслены з жыцця, яно - жыццё, нібыта пастаўленае на паўзу. Там недзе наверсе жыццё ідзе сваёй чарадой, без мяне. Але я не памёр, я жывы! Я не магу памерці, бо вельмі люблю жыццё, сваіх родных і дарагіх людзей. Таму я буду прыкладаць усе намаганні, каб вярнуцца да вас, у жыццё без кратаў. Колькі б часу гэта ні заняло.

Я трымаюся, за мяне не хвалюйцеся, я веру ў лепшае, хаця думаю, што ўваляць нам шмат і дэманстратыўна жорстка."

Генеральная пракуратура накіравала ў суд крымінальную справу супраць Алеся Бяляцкага, Валянціна Стэфановіча і Уладзіміра Лабковіча.

Алесю Бяляцкаму ўручылі Нобелеўскую прэмію міру. Замест палітзняволенага праваабаронцы яе атрымала яго жонка Наталля Пінчук.

"Гэтая прэмія належыць усім маім сябрам-праваабаронцам, усім грамадскім актывістам, дзясяткам тысяч беларусаў, якія прайшлі праз збіцьцё, катаванні, арышты, турму. Гэтая прэмія - узнагарода мільёнам беларускіх грамадзян, якія выступілі ў абарону сваіх грамадзянскіх правоў. Яна падкрэслівае тую драматычную сітуацыю, якая склалася з правамі чалавека ў краіне."

Валянцін Стэфановіч: "Прысуд "Вясне" вясной - гэта сімвалічна".

"Па тэрмінах, думаю, што суд пачнецца ў другой палове студзеня - пачатку лютага. Судзіць будуць доўга, да вясны. Прысуд "Вясне" вясной - гэта сімвалічна )): З улікам апеляцыйнай скаргі ў мяне будзе тры гады ўжо адбытага пазбаўлення волі. Тут зараз акцыя - адсядзі ў СІЗА два гады і атрымай адзін год у падарунак. Гэта я прыдумаў."

"Сімвал барацьбы за свабоду": партрэт Алеся Бяляцкага - цяпер насупраць амбасады Беларусі ў Літве.

"Алесь Бяляцкі для нас з'яўляецца сімвалам і тварам супраціву і барацьбы за свабоду, за дэмакратыю, за еўрапейскую будучыню Беларусі. Ён з'яўляецца Нэльсанам Мандэлам нашых дзён. І Нобелеўскі камітэт гэта прызнаў сваёй узнагародай. У асобе Алеся мы распаўсюджваем вестку пра ўсіх беларусаў, якія знаходзяцца ў турмах як палітвязні, - адзначыў віцэ-міністр замежных спраў Літвы Мантас Адаменас."

Пачатак суда над Алесем Бяляцкім, Уладзімірам Лабковічам і Валянцінам Стэфановічам.

Трэці Дзень народзінаў Марфы Рабковай за кратамі.

Уладзімір Лабковіч кепска сябе адчуваў падчас суда.

Леанід Судаленка за кратамі два гады.

У Іспаніі прайшоў шэраг сустрэч з прадстаўнікамі лаўрэатаў Нобелеўскай прэміі міру. Ад "Вясны" ў мерапрыемствах брала ўдзел праваабаронца Наталля Сацункевіч.

Ва Украіне, у Тэрнопалі, адбылося адмысловае гашэнне маркі і канверта, прысвечанага Алесю Бяляцкаму. Акцыю зладзіў украінскі грамадскі дзеяч Уладзімір Ханас.

Пракурор запатрабаваў для праваабаронцаў ад 9 да 12 гадоў зняволення.

Вясноўцы выступілі на судзе з апошнім словам.

Разгляд апеляцыйных скаргаў Марфы Рабковай і Андрэя Чапюка.

Алесю Бяляцкаму, Валянціну Стэфановічу і Уладзю Лабковічу вынесены прысуды.

Салідарнасць з асуджанымі на вялікія тэрміны вясноўцамі.

"Алесь павярнуўся да слухачоў і вельмі шырока і душэўна ўсміхнуўся ў залу".

"Пасля таго як канвой пачаў патрабаваць ад прысутных пакінуць залу, Алесь павярнуўся да слухачоў і вельмі шырока і душэўна ўсміхнуўся ў залу некалькі секунд так, што не ўбачыць яго рэакцыю было проста немагчыма. Гэтым ён паказваў, што ён нязломны, у ім дастаткова сіл на барацьбу і агучаныя тэрміны - гэта толькі перашкода, якую ён пераадолее."

Марфу Рабкову і Андрэя Чапюка этапавалі ў калоніі.

КДБ дадаў Марфу Рабкову і Андрэя Чапюка ў "спіс тэрарыстаў".

Падчас сесіі Савета ААН па правах чалавека асудзілі пераслед праваабаронцаў у Беларусі.

Наталля Пінчук сустракалася з кіраўніцтвам Польшчы.

Жонка Алеся Бяляцкага, Наталля Пінчук, узяла ўдзел у прэзентацыі кніг "Алесь" выдання Беларускага ПЭНа і "Алесь Бяляцкі на Свабодзе" выдання "Бібліятэкі Радыё Свабода" ў Вільні.

Пракурор падаў апеляцыйны пратэст на прысуд Бяляцкаму, Стэфановічу і Лабковічу.

Пошта Украіны на прыватную замову выпусціла канверты і маркі ў гонар беларускіх нобелеўскіх лаўрэатаў - праваабаронцы Алеся Бяляцкага, якога ўганаравалі Нобелеўскай прэміяй міру ў 2022 годзе, і пісьменніцы Святланы Алексіевіч, узнагароджанай Нобелеўскай прэміяй у галіне літаратуры ў 2015 годзе.

Валянцін Стэфановіч: "Я маю цвёрды намер усё гэта вытрымаць і абавязкова вярнуцца ў гэты свет".

"Увязненне падобнае на смерць. Я ўжо пісаў неяк пра гэта. Ты нібыта і не памёр, але надоўга выкраслены з жыцця, і жыццё, яно ідзе, працягваецца, але без цябе. Але я маю цвёрды намер усё гэта вытрымаць і абавязкова вярнуцца ў гэты свет."

Спектакль-чытанне паводле твораў Алеся Бяляцкага і Максіма Знака.

Марфе Рабкова ў СІЗА-1 прапаноўвалі патэлефанаваць сваякам у абмен на прызнанне.

"У нейкі момант яе выклікаў псіхолаг, даў ліст з весткай аб смерці бабулі, а на наступны дзень прыйшоў ГУБАЗіК і сказаў: "Вось бачыш, мы прапаноўвалі табе патэлефанаваць, але ты ўпарцішся"."

Разгляд апеляцыйнай скаргі на прысуд лідарам "Вясны".

27-я гадавіна заснавання "Вясны".

Прэзідэнт Польшчы заклікаў падтрымаць Алеся Бяляцкага.

"Мы павінны ўзмацніць ціск на рэжым Лукашэнкі, каб вызваліць усіх палітвязняў, у тым ліку журналіста Андрэя Пачобута і лаўрэата Нобелеўскай прэміі міру Алеся Бяляцкага."

Андрэю Чапюку споўнілася 27 гадоў.

Дзень салідарнасці з палітзняволенымі ў Беларусі.

Незалежны мастак-карыкатурыст з Індыі Асім Трыведзі прысвяціў адну са сваіх прац "Вясне".

Міжнародная праваабаронца Саша Кулаева звярнулася да палітзняволеных вясноўцаў з адкрытым лістом.

"Мы так чакаем вас! Мы верым, што наша сустрэча не за гарамі, мы зычым вам сіл вытрымаць гэты страшны шлях, мы робім усё, каб бессэнсоўнасць расправы над вамі стала ясная і тым, ад каго яна зыходзіць, бо наладжаная вамі справа працягваецца, ваша невінаватасць у абсурдных абвінавачваннях прагучала на ўвесь свет, кожны праведзены вамі ў няволі дзень дадае вагі вашаму аўтарытэту і пашырае шэрагі тых, хто вас падтрымлівае."

103 нобелеўскія лаўрэаты выказалі салідарнасць з Алесем Бяляцкім.

Наталля Пінчук выступіла на World Expression Forum.

"Вызваленне зняволеных - не прадмет для бясконцых перамоваў, не тавар для гандлю, а адзінае выйсце з тупіку, у які дыктатар завёў краіну і народ. Перамовы з Лукашэнкам, за якім стаіць цень Пуціна, безвыніковыя. Таму вялікая павага тым краінам і палітыкам, якія праяўляюць прынцыповасць і не маюць ілюзій.

Належыць спадзявацца і на цвёрдасць міжнародных арганізацыяў, якія павінны стаяць на варце дэмакратычных каштоўнасцяў і міру."

Шпацыр салідарнасці з палітзняволенымі вясноўцамі ў Вільні.

Бяляцкі, Лабковіч і Стэфановіч 700 дзён за кратамі.

На найбуйнейшым форуме па правах чалавека ў свеце Цімаці Снайдэр стаў голасам Алеся Бяляцкага.

Леанід Судаленка на волі!