#FreeViasna

Віталь Віктаравіч Чопік — валанцёр "Вясны", жыхар Брэста, які назіраў за палітычна матываванымі судамі.

Быў затрыманы 12 сакавіка 2024 года, пасля чаго мужчыну дастаўлялі ў шпіталь на хуткай са слядамі моцнага збіцця.

Спачатку Віталю прызначылі адміністрацыйны арышт, а пазней перавялі ў СІЗА. Яму прад'явілі абвінавачыванні паводле двух артыкулаў: за ўдзел ў пратэстах (арт. 342 КК) і садзейнічанне экстрэмісцкай дзейнасці (арт. 361-4 КК).

Заява аб прызнанні палітзняволеным

15 лістапада 2024 года ў Брэсцкім абласным судзе Віталю агучылі прысуд: сем гадоў пазбаўлення волі, а таксама штраф памерам 1000 базавых велічыняў (40 000 рублёў).

У лістападзе 2025 г. на аўкцыёне прадалі двухпакаёвую кватэру палітвязня ў лік пагашэння штрафу, прызначанага судом.

У снежні 2025 г. рэжым утрымання Віталя быў зменены, мужчыну перавялі ў турму.

 7 лютага 2025 г. унесены МУС у "спіс экстрэмістаў".

Віталь Чопік гуляў у футбол, браў удзел у гарадской аматарскай лізе міні-футбола. Ён вельмі шмат чытаў, меў чытацкі білет ва ўсіх бібліятэках Брэста.

Напішы ліст Віталю:

Святлана Вячаславаўна Якубовіч — валанцёрка гомельскай "Вясны".

Мае вышэйшую педагагічную адукацыю, доўгі час працавала выхавацельніцай ў дашкольных установах г. Гомеля. У Святланы была вышэйшая прафесійная катэгорыя і выдатная характарыстыка, але за погляды і перакананні яе звольнілі з працы ў 2021 годзе.

Была затрыманая 31 кастрычніка 2024 года разам з мужам Станіславам Мачалавым у Гомелі і абвінавачаная паводле ч. 1 і ч. 2 арт. 361-4 Крымінальнага кодэксу (садзейнічанне экстрэмісцкай дзейнасці, здзейсненае паўторна або групай асобаў). Падрабязнасці справы невядомыя.

Заява аб прызнанні палітзняволенай

26 лістапада 2025 года ў Гомельскім абласным судзе Святлане вынеслі прысуд: пяць гадоў пазбаўлення волі ў калоніі ва ўмовах агульнага рэжыму.

Мае праблемы са здароўем: вельмі кепскі зрок і захворванне шчытападобнай залозы.

 27 сакавіка 2026 г. МУС унесла палітзняволеную ў "экстрэмісцкі спіс".

Святлана — вельмі крэатыўная, творчая, эмпатыйная натура, заўзятая турыстка, вельмі любіць вандраваць і шануе людзей. З любоўю і захапленнем заўсёды распавядала пра сваю маці; пра сваіх гадаванцаў — трох катоў, якіх падабрала на вуліцы; пра супруга, які яшчэ ў 2022 годзе за ўдзел у акцыях пратэсту быў асуджаны на 3 гады зняволення.

Напішы ліст Святлане:

Станіслаў Валер'евіч Мачалаў — валанцёр гомельскай "Вясны", двойчы палітвязень.

Да першага зняволення працаваў у IT-сферы. Быў затрыманы ў траўні 2021 года і асуджаны за ўдзел у акцыях пратэсту на 3 гады пазбаўлення волі.

У лютым 2022 года Станіслаў пабраўся шлюбам у гомельскім СІЗА-3 са Святланай Якубовіч. 30 снежня 2023 года выйшаў на волю, цалкам адбыўшы тэрмін.

У другі раз мужчыну затрымалі 31 кастрычніка 2024 года, калі ён сустракаў жонку на аўтавакзале, якая тады вярталася з Вільні. Станіслава абвінавацілі паводле ч. 1 і ч. 2 арт. 361-4 Крымінальнага кодэксу (садзейнічанне экстрэмісцкай дзейнасці, здзейсненае паўторна або групай асобаў). Падрабязнасці справы невядомыя.

Заява аб прызнанні палітзняволеным

26 лістапада 2025 года ў Гомельскім абласным судзе Станіславу вынеслі прысуд: чатыры гады пазбаўлення волі ў калоніі ва ўмовах строгага рэжыму.

Падчас знаходжання ў СІЗА-3 Станісаў перанёс мікраінсульт, бо хворы на гіпертанію.

Дакладна вядома, што палітвязню не выдалі дазвол на ліставанне з жонкай.

 28 кастрычніка 2022 г. МУС унесла палітзняволенага ў "экстрэмісцкі спіс".

Станіслаў, як і яго жонка, захапляецца падарожжамі і турызмам, любіць едзіць на ровары.

Напішы ліст Станіславу:

Алесь Віктаравіч Бяляцкі — заснавальнік і кіраўнік Праваабарончага цэнтру «Вясна», віцэ-прэзідэнт Міжнароднай фэдэрацыі за правы чалавека (FIDH) з 2007 па 2016 гг, лаўрэат Нобелеўскай прэміі міру 2022 года.

За 25 год сваёй дзейнасці Алесь Бяляцкі быў адзначаны шматлікімі прэміямі і ўзнагародамі: у 2006 годзе — шведскай прэміяй імя Пера Ангера, прэміяй Свабоды імя Андрэя Сахарава, прэміяй Homo Homіnі, якую ўручаў Вацлаў Гавел, у 2011 годзе — дыпломам “За мужнасць і барацьбу за свабоду”, прэміяй “Лепшы праваабаронца года”, прэміяй Нарвежскага саюза пісьменнікаў “За свабоду слова”, у 2012 годзе — прэміяй Дзярждэпартамента ЗША, прэміяй Леха Валенсы, прэміяй імя Петры Кэлі ў знак прызнання дзейнасці ў адстойванні правоў чалавека ў Беларусі, у 2013 годзе — прэміяй Вацлава Гавела ад ПАСЕ, у 2019 годзе — прэміяй “За правы чалавека і вяршэнства закона”, а ў 2020 годзе — прэміяй “За годны лад жыцця” і сумесна з іншымі прэміяй імя Сахарава. Пяць разоў вылучаўся на Нобелеўскую прэмію міру, а восенню 2022 года стаў яе лаўрэатам.

Быў затрыманы 14 ліпеня 2021 года ў межах крымінальнай справы, у яго дома і ў офісе арганізацыі адбыўся ператрус.

Заява аб прызнанні палітзняволеным

6 кастрычніка 2021 года стала вядома, што Алесю Бяляцкаму прад’явілі абвінавачванне толькі па адным артыкуле Крымінальнага кодэкса – ч. 2 арт. 243 (ухіленне ад выплаты падаткаў). Праваабаронцам ставілася ў віну тое, што яны "не зарэгістравалі арганізацыю, якой яны кіруюць, ва ўстаноўленым парадку ў якасці юрыдычнай асобы, а таксама ў якасці падаткаплацельшчыка, і не прадставілі адпаведныя звесткі ў падатковыя органы, чым схавалі ад падатковых органаў звесткі аб ажыццяўлёных выплатах, асобах, якія выплацілі ад імя арганізацыі працы (якія аказалі паслугі) і ўхіліліся ад прызнання арганізацыі падаткавым агентам". Санкцыя па гэтым артыкуле прадугледжвала пакаранне да 7 гадоў пазбаўлення волі.

На прыканцы верасня 2022 года крымінальная справа ў дачыненні да Алеся Бяляцкага, Валянціна Стэфановіча, Уладзіміра Лабковіча і іншых вясноўцаў паводле ч. 2 арт. 243 Крымінальнага кодэкса была спыненая. Але праваабаронцаў не вызвалілі з-пад варты — ім выставілі новыя абвінавачванні ў кантрабандзе (незаконным перамяшчэнні праз мытную мяжу Еўразійскага эканамічнага саюза ў буйным памеры наяўных грашовых сродкаў арганізаванай групай) паводле ч. 4 арт. 228 Крымінальнага кодэкса і фінансаванні групавых дзеянняў, якія груба парушаюць грамадскі парадак паводле ч. 2 арт. 342 Крымінальнага кодэкса.

Суд над вясноўцамі распачаўся 5 студзеня 2023 года і праходзіў вельмі хутка. За 19 дзён суддзя Марына Запаснік паспела выслухаць сведкаў, азнаёміцца з 284 (!) тамамі крымінальнай справы, заслухаць паказанні зняволеных праваабаронцаў.

Спрэчкі бакоў адбыліся 9 і 10 лютага, пракурор Аляксандр Кароль запрасіў для Алеся Бяляцкага 12 гадоў калоніі, што з'яўлялася максімальным тэрмінам па інкрымінуемых праваабаронцу артыкулах.

"Досыць, трэба спыняць гэтую грамадзянскую вайну!" Апошняе слова Алеся Бяляцкага ў судзе

3 сакавіка 2023 года быў агучаны прысуд па справе "Вясны". Алеся Бяляцкага пакаралі 10 гадамі зняволення і прызначылі штраф у памеры 5000 базавых велічыняў (185 000 рублёў). Таксама суд пастанавіў спагнаць у салідарным парадку з Бяляцкага, Стэфановіча, Лабковіча і Салаўёва суму ў памеры 752 438 рублёў 62 капеек (амаль 300 000 даляраў), якую яны нібыта "здабылі злачынным шляхам" праз "кантрабанду арганізаванай групай".

Міжнародная супольнасць выступіла з рэзкай крытыкай прысуду праваабаронцам "Вясны".

13 снежня 2025 г. Алесь Бяляцкі выйшаў на волю па памілаванні ў выніку перамоваў амерыканскай дэлегацыі з рэжымам Лукашэнкі. Быў вывезены ў Літву.

Усе навіны пра Алеся Бяляцкага

Валянцін Канстанцінавіч Стэфановіч - сябра Рады «Вясны», былы віцэ-прэзідэнт Міжнароднай федэрацыі за правы чалавека (FIDH). З’яўляецца адным з вядомых экспертаў і аналітыкаў у сферы правоў чалавека, выступае за недыскрымінацыю і супраць смяротнага пакарання. Удзельнічаў у розных міжнародных канференцыях і пасяджэннях, правабарончых місіях і назіраннях за выбарамі ў краінах АБСЕ.

Да Валянціна з вобшукам сілавікі прыйшлі ранкам 14 ліпеня 2021 года, канфіскавалі ўсю тэхніку, а самаго праваабаронцу павезлі на допыт, пасля чаго змясцілі пад варту.

Заява аб прызнанні палітзняволеным

Валянціну Стэфановічу былі прад'яўленныя абвінавачванні ва ўхіленні ад выплаты падаткаў (арт. 243 КК).

Праваабаронцам ставілася ў віну тое, што яны "не зарэгістравалі арганізацыю, якой яны кіруюць, ва ўстаноўленым парадку ў якасці юрыдычнай асобы, а таксама ў якасці падаткаплацельшчыка, і не прадставілі адпаведныя звесткі ў падатковыя органы, чым схавалі ад падатковых органаў звесткі аб ажыццяўлёных выплатах, асобах, якія выплацілі ад імя арганізацыі працы (якія аказалі паслугі) і ўхіліліся ад прызнання арганізацыі падаткавым агентам". Санкцыя па ім прадугледжвала пакаранне да 7 гадоў пазбаўлення волі.

На прыканцы верасня 2022 года крымінальная справа ў дачыненні да Алеся Бяляцкага, Валянціна Стэфановіча, Уладзіміра Лабковіча і іншых вясноўцаў паводле ч. 2 арт. 243 Крымінальнага кодэкса была спыненая. Але "вясноўцаў" не вызвалілі з-пад варты — ім выставілі новыя абвінавачванні ў кантрабандзе (незаконным перамяшчэнні праз мытную мяжу Еўразійскага эканамічнага саюза ў буйным памеры наяўных грашовых сродкаў арганізаванай групай) паводле ч. 4 арт. 228 Крымінальнага кодэкса і фінансаванні групавых дзеянняў, якія груба парушаюць грамадскі парадак, паводле ч. 2 арт. 342 Крымінальнага кодэкса.

Суд над вясноўцамі распачаўся 5 студзеня 2023 года і праходзіў вельмі хутка. За 19 дзён суддзя Марына Запаснік паспела выслухаць сведкаў, азнаёміцца з 284 (!) тамамі крымінальнай справы, заслухаць зняволеных праваабаронцаў.

Спрэчкі бакоў адбыліся 9 і 10 лютага, пракурор Аляксандр Кароль запрасіў для Валянціна Стэфановіча 10 гадоў калоніі.

"Мы пражылі не дарма жыццё — мы падрыхтавалі сабе замену". Апошняе слова Валянціна Стэфановіча ў судзе

3 сакавіка 2023 года быў агучаны прысуд па справе "Вясны". Валянціна Стэфановіча пакаралі 9 гадамі зняволення і прызначылі штраф у памеры 3000 базавых велічыняў (111 000 рублёў). Таксама суд пастанавіў спагнаць у салідарным парадку з Бяляцкага, Стэфановіча, Лабковіча і Салаўёва суму ў памеры 752 438 рублёў 62 капеек (амаль 300 000 даляраў), якую яны нібыта "здабылі злачынным шляхам" праз "кантрабанду арганізаванай групай".

Міжнародная супольнасць выступіла з рэзкай крытыкай прысуду праваабаронцам "Вясны".

19 сакавіка 2026 г. Валянцін Стэфановіч выйшаў на волю ў выніку перамоваў амерыканскай дэлегацыі з рэжымам Лукашэнкі. Адразу па вызваленні быў вывезены ў Літву, а потым — пераехаў у Польшчу, дзе ўз'яднаўся са сваёй сям'ёй.

Усе навіны пра Валянціна Стэфановіча

Леанід Леанідавіч Судаленка - старшыня Гомельскага аддзялення Праваабарончага цэнтра "Вясна". Ён дапамагаў грамадзянам у падрыхтоўцы і накіраванні шматлікіх індывідуальных зваротаў у Камітэт па правах чалавека ААН супраць Беларусі. 

За сваю праваабарончую дзейнасць быў узнагароджаны прэстыжнай французскай прэміяй "Свабода-Роўнасць-Братэрства" ў 2019 годзе. У тым жа годзе беларускай праваабарончай супольнасцю ён быў удастоены Нацыянальнай прэміяй за дасягненні ў галіне правоў чалавека ў намінацыі "Праваабаронца года".

Леанід быў затрыманы раніцай 18 студзеня 2021 года па дарозе на офіс і змешчаны пад варту. Яму прад'явілі абвінавачванні ў арганізацыі групавых дзеяннях, якія груба парушаюць грамадскі парадак (ч. 1 арт. 342 КК), і ў навучанні ці іншай падрыхтоўцы асобаў для ўдзелу ў іх, а таксама фінансаванні такіх дзеянняў (ч. 2 арт. 342 КК).

Заява аб прызнанні палітзняволеным

3 верасня 2021 года ў судзе Цэнтральнага раёна г. Гомеля распачаўся працэс над Леанідам Судаленкам і валанцёркамі "Вясны" Таццянай Ласіцай і Марыяй Тарасенка. Суддзя Сяргей Салоўскі вынес пастанову, якой вызначыў праводзіць суд у закрытым пасяджэнні на працягу ўсяго разбіральніцтва.

А 3 лістапада 2021 года суддзя агучыў прысуд, якім прызначыў Леаніду Судаленку тры гады калоніі з адбываннем пакарання ва ўмовах агульнага рэжыму.

21 ліпеня 2023 года Леанід Судаленка выйшаў на волю, цалкам адбыўшы тэрмін пакарання, прызначаны судом.

Усе навіны пра Леаніда Судаленку

Уладзімір Мікалаевіч Лабковіч - юрыст "Вясны", каардынатар кампаніі "Праваабаронцы за свабодныя выбары ў Беларусі" і эксперт у галіне выбарчага права. Уладзімір займаецца праваабарончай дзейнасцю ў «Вясне» ўжо 23 гады.

Уладзімір быў затрыманы разам з жонкай Нінай Лабковіч 14 ліпеня 2021 года пасля вобшуку ў іх кватэры. Спачатку іх павезлі ў ДФР, а затым на допыт у Следчы камітэт.

Заява аб прызнанні палітзняволеным

Уладзіміру Лабковічу былі прад'яўленныя абвінавачванні ва ўхіленні ад выплаты падаткаў (арт. 243 КК).

Праваабаронцам ставілася ў віну тое, што яны "не зарэгістравалі арганізацыю, якой яны кіруюць, ва ўстаноўленым парадку ў якасці юрыдычнай асобы, а таксама ў якасці падаткаплацельшчыка, і не прадставілі адпаведныя звесткі ў падатковыя органы, чым схавалі ад падатковых органаў звесткі аб ажыццяўлёных выплатах, асобах, якія выплацілі ад імя арганізацыі працы (якія аказалі паслугі) і ўхіліліся ад прызнання арганізацыі падаткавым агентам". Санкцыя па ім прадугледжвала пакаранне да 7 гадоў пазбаўлення волі.

На прыканцы верасня 2022 года крымінальная справа ў дачыненні да Алеся Бяляцкага, Валянціна Стэфановіча, Уладзіміра Лабковіча і іншых вясноўцаў паводле ч. 2 арт. 243 Крымінальнага кодэкса была спыненая. Але "вясноўцаў" не вызвалілі з-пад варты — ім выставілі новыя абвінавачванні ў кантрабандзе (незаконным перамяшчэнні праз мытную мяжу Еўразійскага эканамічнага саюза ў буйным памеры наяўных грашовых сродкаў арганізаванай групай) паводле ч. 4 арт. 228 Крымінальнага кодэкса і фінансаванні групавых дзеянняў, якія груба парушаюць грамадскі парадак, паводле ч. 2 арт. 342 Крымінальнага кодэкса.

Суд над вясноўцамі распачаўся 5 студзеня 2023 года і праходзіў вельмі хутка. За 19 дзён суддзя Марына Запаснік паспела выслухаць сведкаў, азнаёміцца з 284 (!) тамамі крымінальнай справы, заслухаць зняволеных праваабаронцаў.

Спрэчкі бакоў адбыліся 9 і 10 лютага, пракурор Аляксандр Кароль запрасіў для Уладзіміра Лабковіча 9 гадоў калоніі.

"Я ўспрымаю той тэрмін, які быў запрошаны, як непераадольны". Апошняе слова Уладзіміра Лабковіча ў судзе

3 сакавіка 2023 года быў агучаны прысуд па справе "Вясны". Уладзіміра Лабковіча пакаралі 7 гадамі зняволення і прызначылі штраф у памеры 3000 базавых велічыняў (111 000 рублёў). Таксама суд пастанавіў спагнаць у салідарным парадку з Бяляцкага, Стэфановіча, Лабковіча і Салаўёва суму ў памеры 752 438 рублёў 62 капеек (амаль 300 000 даляраў), якую яны нібыта "здабылі злачынным шляхам" праз "кантрабанду арганізаванай групай".

Міжнародная супольнасць выступіла з рэзкай крытыкай прысуду праваабаронцам "Вясны".

13 снежня 2025 г. Уладзь Лабковіч выйшаў на волю па памілаванні ў выніку перамоваў амерыканскай дэлегацыі з рэжымам Лукашэнкі. Быў вывезены ва Украіну.

Усе навіны пра Уладзіміра Лабковіча

Таццяна Леанідаўна Ласіца – актывістка і праваабаронца з Рэчыцы, валанцёрка Гомельскага аддзялення Праваабарончага цэнтру "Вясна".

Яна абвінавачаная па крымінальнай справе паводле ч. 1 і ч. 2 арт. 342 КК (арганізацыя групавых дзеяннях, якія груба парушаюць грамадскі парадак, і навучанне ці іншая падрыхтоўка асобаў для ўдзелу ў іх, а таксама фінансаванні такіх дзеянняў).

3 верасня 2021 года ў судзе Цэнтральнага раёна г. Гомеля распачаўся працэс над праваабаронцам “Вясны” Леанідам Судаленкам і валанцёркамі арганізацыі Таццянай Ласіцай і Марыяй Тарасенка. Суддзя Сяргей Салоўскі вынес пастанову, якой вызначыў праводзіць суд у закрытым пасяджэнні на працягу ўсяго разбіральніцтва.

А 3 лістапада 2021 года суддзя агучыў прысуд, якім прызначыў Таццяне Ласіцы два гады і шэсць месяцаў калоніі з адбываннем пакарання ва ўмовах агульнага рэжыму.

24 верасня 2022 года Таццяну Ласіцу вызвалілі з папраўчай калоніі паводле памілавання. За кратамі яна правяла 1 год і 8 месяцаў.

Усе навіны пра Таццяну Ласіцу

Андрэй Сяргеевіч Чапюк – валанцёр Праваабарончага цэнтру "Вясна". Быў затрыманы 2 кастрычніка 2020 года ў Мінску супрацоўнікамі ГУБАЗіК.

Уся дзейнасць Андрэя Чапюка насіла выключна мірны, праваабарончы характар і была накіраваная на дапамогу людзям, якія пакутуюць за свае палітычныя погляды і перакананні, за абарону сваіх правоў.

Заява аб прызнанні палітзняволеным

9 кастрычніка Андрэю было прад'яўленае абвінавачванне па ч. 2 арт. 293 Крымінальнага кодэкса – "Удзел у масавых беспарадках". А 28 студзеня стала вядома, што супраць яго і яшчэ некалькіх чалавек узбуджаная крымінальная справа па ч. 2 арт. 285 Крымінальнага кодэксу – "Удзел у злачыннай арганізацыі ў любой іншай форме".

25 красавіка 2022 года ў Мінскім гарадскім судзе пачаўся разгляд крымінальнай справы ў дачынені да Андрэя Чапюка, Марфы Рабковай і яшчэ 8 палітвязняў. Па прапанове пракурора Рамана Бізюка суддзя Сяргей Хрыпач зрабіў разгляд справы ў закрытым рэжыме, хоць усе абвінавачаныя і іх абаронцы выступілі супраць.

Вядома, што Андрэя Чапюка абвінавачваюць па ч. 2 арт. 285 КК - "удзел у злачыннай арганізацыі", ч. 1 арт. 130 КК - "распальванне іншай сацыяльнай варожасці", арт. 341 КК - "апаганьванне збудаванняў і псаванне маёмасці" і ч. 1 арт. 13 ч. 2 арт. 293 КК - "падрыхтоўка да ўдзелу ў масавых беспарадках".

"Кожны ў хуткім часе адкажа за свае дзеянні, за свае рашэнні перад грамадствам". Апошняе слова Андрэя Чапюка ў судзе

6 верасня 2022 г. быў вынесены прысуд Андрэю: 6 гадоў калоніі ва ўмовах узмоцненага рэжыму і штраф у памеры 500 базавых велічыняў (16 000 беларускіх рублёў ці больш за 6 300 даляраў).

28 лютага 2023 года Вярхоўны суд у закрытым рэжыме разглядзеў апеляцыйныя скаргі на прысуд Марфы Рабковай і Андрэя Чапюка. Судовая калегія пад старшынствам суддзі Аляксея Рыбакова скараціла тэрміны вясноўцам на тры месяцы. Такім чынам, Андрэю Чапюку канчаткова прызначылі 5 гадоў і 9 месяцаў зняволення, а таксама штраф у 500 б.в.

15 cакавіка 2023 года хлопца этапавалі ў папраўчую калонію № 22.

18 красавіка 2025 года Андрэй Чапюк цалкам адбыў прызначаны тэрмін зняволення і выйшаў на свабоду.

Усе навіны пра Андрэя Чапюка

Марыя (Марфа) Аляксандраўна Рабкова – каардынатарка Валанцёрскай службы "Вясны", праваабаронца.

Была затрыманая разам з мужам Вадзімам Жаромскім вечарам 17 верасня 2020 года і дастаўленая ў ГУБАЗіК. У яе кватэры быў праведзены ператрус, вынятая тэхніка, асабістыя грошы і рэчы.

Марфе Рабковай паведамілі, што яна затрыманая ў межах крымінальнай справы па ч. 3 арт. 293 Крымінальнага кодэксу (навучанне ці іншая падрыхтоўка асобаў для ўдзелу ў масавых беспарадках, альбо фінансаванне такой дзейнасці). Па гэтым артыкуле ёй і было прад'яўлена абвінавачванне.

Заява аб прызнанні палітзняволенай

11 лютага 2021 года Марфе прад'явілі новыя абвінавачванні па ч. 3 арт. 130 (распальванне сацыяльнай варажнечы да ўлады групай невысветленых асобаў) і ч. 2 арт. 285 Крымінальнага кодэкса (удзел у злачыннай арганізацыі).

25 красавіка 2022 года ў Мінскім гарадскім судзе пачаўся разгляд крымінальнай справы ў дачынені да Марфы Рабковай, Андрэя Чапюка і яшчэ 8 палітвязняў. Па прапанове пракурора Рамана Бізюка суддзя Сяргей Хрыпач зрабіў разгляд справы ў закрытым рэжыме, хоць усе абвінавачаныя і іх абаронцы выступілі супраць.

Вядома, што Марфе Рабковай выстаўленыя абвінавачванні па 10 артыкулах Крымінальнага кодэкса: ч. 1 арт. 285 — "стварэнне і кіраванне злачыннай арганізацыяй", ч. 1 арт. 361-1 — "стварэнне экстрэмісцкага фарміравання і ўдзел у ім", ч. 3 арт. 130 — "распальванне іншай сацыяльнай варожасці групай асобаў", ч. 1 і ч. 3 арт. 293 — "арганізацыя масавых беспарадкаў і навучанне іншых асобаў да ўдзелу ў масавых беспарадкаў", а таксама ч. 1 арт. 13 ч. 2 арт. 293 — "падрыхтоўка да ўдзелу ў масавых беспарадках", ч. 3 арт. 361 — "заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь з выкарыстаннем сродкаў масавай інфармацыі або глабальнай камп'ютарнай сеткі Інтэрнэт", ч. 1 арт. 342 — "арганізацыя групавых дзеянняў, якія груба парушаюць грамадскі парадак", ч. 2 арт. 339 — "злоснае хуліганства", арт. 341 - апаганьванне збудаванняў і псаванне маёмасці", арт. 218 — "наўмысныя знішчэнне альбо пашкоджанне маёмасці, здзейсненыя агульнанебяспечным спосабам", ч. 2 арт. 295-3 — "незаконныя дзеянні ў дачыненні да прадметаў, дзеянне якіх заснавана на выкарыстанні гаручых рэчываў".

"Упэўненая — мы абавязкова ўсё пераадолеем, па-іншаму проста быць не можа". Апошняе слова Марфы Рабковай ў судзе

6 верасня 2022 г. быў вынесены прысуд Марфе: 15 гадоў калоніі ва ўмовах агульнага рэжыму і штраф у памеры 700 базавых велічыняў (22 400 беларускіх рублёў, ці больш за 8 800 даляраў).

28 лютага 2023 года Вярхоўны суд у закрытым рэжыме разглядзеў апеляцыйныя скаргі на прысуд Марфы Рабковай і Андрэя Чапюка. Судовая калегія пад старшынствам суддзі Аляксея Рыбакова скараціла тэрміны вясноўцам на тры месяцы: Марфа была вызваленая ад пакарання ў 3 месяцы арышту паводле арт. 341 Крымінальнага кодэкса ў сувязі з заканчэннем тэрміну даўніны прыцягнення да крымінальнай адказнасці.

Такім чынам, Марфе Рабковай канчаткова прызначылі 14 гадоў і 9 месяцаў зняволення, а таксама штраф у 700 б.в. Акрамя таго, Марфе неабходна сплаціць пазоў ад "Белтэлерадыёкампаніі" ў памеры 2 344 рублі 65 капеек (сумесна з Аляксандрам Францкевічам), дзяржаўную пошліну — 117 рублёў 23 капейкі і працэсуальныя выдаткі — 5 168 рублёў 82 капейкі.

У падтрымку Марфы Рабковай і з патрабаваннем яе неадкладнага вызвалення выказаліся міжнародныя праваабарончыя арганізацыі: Amnesty International, Front Line Defenders, Абсерваторыя па абароне праваабаронцаў.

14 сакавіка 2023 года Марфу Рабкову этапавалі ў папраўчую калонію.

 16 сакавіка 2023 г. КДБ уключыў палітзняволеную ў "тэрарыстычны спіс".
 26 траўня 2023 г. МУС унесла палітзняволеную ў "экстрэмісцкі спіс".

19 сакавіка 2026 г. Марфа Рабкова выйшала на волю ў выніку перамоваў амерыканскай дэлегацыі з рэжымам Лукашэнкі. Адразу па вызваленні была вывезена ў Літву.

Усе навіны пра Марфу Рабкову